Lausafjárstaða

Lausafjárstaða bankans bæði í íslenskum krónum og erlendri mynt er áfram mjög sterk. Lausafjáreignir námu tæpum 235 milljörðum króna í lok árs 2014.

Lausafjáreignir sem hlutfall af innlánum voru 39% í árslok samanborið við 50% í byrjun ársins.

Meginmælikvarði lausafjáráhættu til skamms tíma er lausafjárþekja (LCR) sem mælir hlutfall hágæða lausafjáreigna af heildar nettó útflæði á næstu 30 dögum miðað við álagsaðstæður.

Lausafjárþekja var 131% í lok árs 2014, en Seðlabankinn gerir kröfu um að hlutfallið sé að lágmarki 70%. Lausafjárþekja erlendra mynta var á sama tíma 614%, en Seðlabankinn gerir kröfu um að það hlutfall sé að lágmarki 100%.

Útlán til viðskiptavina námu 718 milljörðum króna í lok árs 2014 samanborið við 680,5 milljarða í byrjun ársins og hækkuðu þau um 6% á árinu.

Hækkun ársins skiptist í 162 milljarða króna vegna nýrra lána og 20 milljarða króna vegna gengisáhrifa, verðbóta og virðisaukningar. Á móti þessari hækkun koma 144 milljarðar króna vegna afborgana viðskiptavina bankans.

Heildareignir bankans hafa lækkað um 53 milljarða á árinu m.a. vegna þess að rífleg lausafjárstaða bankans í erlendum gjaldmiðlum gerði bankanum kleift að fyrirframgreiða um 30 milljarða til LBI hf.

Innlán fjármálafyrirtækja lækkuðu um 68%, eða 113 milljarða króna, og námu tæpum 54 milljörðum króna í lok árs.

Innlán viðskiptavina hækkuðu á árinu um 95 milljarða króna og voru þau 551 milljarður króna samanborið við 456 milljarða króna í upphafi árs. Þessar sveiflur skýrast af því að innlán frá fjármálafyrirtækjum í slitameðferð flokkast ekki lengur sem fjármálafyrirtæki og innlán þeirra bókast því sem innlán viðskiptavina.

Landsbankinn hefur heimild til að greiða skuldina niður að hluta eða að fullu án kostnaðar, hvenær sem er á tímabilinu. Landsbankinn og slitastjórn LBI sömdu einnig um breytingar sem m.a. veita Landsbankanum rétt, við ákveðnar aðstæður, til að fresta greiðslu hluta þeirra fjárhæða sem eru á gjalddaga 2018 og 2020.

Skattar og gjöld til ríkis og stofnana námu 9,8 milljörðum árið 2014, sem er lækkun um 2,5 milljarða. Hreinar vaxtatekjur námu 28 milljörðum króna á árinu 2014 samanborið við 34,3 milljarða króna á árinu 2013. Vaxtamunur sem hlutfall af meðalstöðu heildareigna var 2,4% á árinu 2014 en 3,1% á árinu 2013.

Virðisbreytingar útlána hafa á undanförnum árum haft mikil áhrif á sveiflur í rekstarafkomu. Á árinu 2014 er færð virðisaukning á útlánum upp á 20 milljarða króna samanborið við 13 milljarða virðisaukningu á árinu 2013. Hreinar þjónustutekjur námu 5,8 milljörðum króna á árinu 2014 sem er hækkun um 545 milljónir á milli ára. Sú hækkun byggist að langstærstum hluta á tekjum af sölu á fyrirtækjum.

Aðrar rekstartekjur námu 9,1 milljarði króna á árinu 2014 samanborið við 11,8 milljarða króna á árinu 2013. Aðrar rekstartekjur ársins 2014 eru að mestu hagnaður af hlutabréfum upp á um 6 milljarða króna og 616 milljóna króna tekjur af markaðsskuldabréfum. Einnig má nefna tekjur af sölu á hlut Landsbankans í kortafyrirtækjunum Valitor og Borgun.